موتعبان

موتعبان ..
دنيه امن التعب .. وعيوني عنوان
وتتلملم الناس ابروحي الوان
كلها الوان ..
بس يا لون ياخذني الوطنه..
وارجع انسان
اتذكرغرفتي.. وبيتنه
واتلمس الحيطان
واغفه ويه الحلم.. واتخيل البيبان
بلكت ايد تطبگ على السرگي
وتفتح احزاني
ويطگ ريحان
يصير الباب شارع يظم كل انسان
وانورد وياكم .. ساجيه وبستان
چم بستان..
مر بيه وچنت حيران
چم غفوة نهر سافرت بيه
وهمت بيها ابلايه عنوان
چم ليله غفه وياها العمر
والعمر تعبان
الناس نامت.. وانه انطر
والضوه باخر محطه..وانه سكران
انه علمت اليتيم الحزن
ومن ونيني اتعلم ايون الحمام
وصار من نوحي.. حمام
بيه سولة شاطي وايغني غرام
بيه صفنة عاشگ وضايع هيام
بيه داخت كل بساتين الورد
واسكرت وحدي ابلا مدام
مدري منهو.. ؟
يكتب ابروحي اغاني
مدري شنهي من اغاني
لاينام..
ولا ايخلي الليل بعيوني اينام
/ المانيا / قلعة سكر